اول شيء نقول الحمدلله على سلامتك ورجعتك من السفر وكل عام وانت بخير
بصراحة فكرتك حلوة , والظاهر اني هنا متواجد يوميا لانقل لكم وقائعي اليومية والاحداث
الموهم انا بصراحة كنت متوقع رمضان هالسنة غير ؟؟ تدرين ليه ؟؟ لاني راح اصوم رمضان عند اهلي ,
ونفتك من العزوبية وكنت دايم ادعي لهم عشان عطونا هالاجازة
الموهم ماودي اطول الكلام ,
طبعا انا جدولي عند اهلي يعني زي ماتقولين منظم , الموهم فترة العصر وبعد العشاء رياضة
في ليلة واحد رمضان تحديدا لعبت مباراة كورة قدم وكانت مباراة الله لايوريك نار تعرفين وش معنى نار
يعني ماتلحق تاخذ نفس من قوا المباراة والمشكلة انا مركزي في الفريق صانع لعب وارجع اغطي محور ارتكاز الموهم في الدقيقة 35 الشوط الثاني جات هجمة مرتدة وكنت ماشي بالهجمة من الدفاع وبسرعة عشان اوصلها للهجوم تعرضت للاصابة الله لايوريك .
---- مالي حيلة جاني ذاك المدافع اللي سبحان الله العظيم ماتفرق بينه وبين الجدار الف يمين يلف معي الف يسار يلف معي وانا اطول الكورة قدام وادعس لاني انا اسرع منه , اقسم بالله ماحلفتك انا تعديته بس
الا الله لايوريك مسوي لي مقصه برجيلنه الثنتين وانا اطير مع السماء << ماني قايلك جدار ,
واطيح على ركبتي اليمنى والا الدمان والدنيا سبحان الله العظيم احس رجلي اليمنى خلاص مااقدر اوقف ,
بيني وبينك اكثر مايخيفني انه عندي رباط صليبي او انزلاق في الصابونة , وبعدين مافي مستشفى قريب
اقرب مستشفى 90 كيلو ولابعد عندهم اشعة رنيني مغناطيسي عشان اعرف ان عندي انزلاق في الصابونة
رحت للمستشفى وياليتني مارحت له , الله يخلف , عاد انا قررت اذا جيت الرياض اخذ اشعة رنين في سليمان الحبيب او الالماني , هذي كانت ليلة رمضان والحين لي 4 ايام واعاني معاناة الله لايوريك مع هالركبة
الم فظيــــــــــــــع .
== والناس الحين تروح وتسافر وتطلع في رمضان وانا عكازي معي تقول شايب وعاد ماشا الله انواع الخلطات عندي كل شوي العجز اللي عندنا في الديرة
اللي جايبها صبخة واللي مادري كيف لونها ههههههه الموهم ان ركبتي تحولت من اللون الابيض الى اللون الاخضر ههههه وبس ..
انا عارف اني طولت ..., بس مازال عندي كلاااااااااام وللحديث بقية
والحين استذنكم ودي اناااااااااام بس الظاهر ركبتي ماهي بمخليتني اناااااااام,,, اهـ ياركبتي .
ادعولي
وراجع عن قريب انشا الله
تحياتي لك يا ص خ ب
الإهداءات
09-03-2008, 04:31 AM
الخيمة الرمضانية
